我們為什麼成為寄養家庭？
上次講到我哋帶第六個寄養小朋友去旅行，終於成功帶佢坐第一次飛機。
「係咪本身就想幫人，想做好事？」
但老實講，起點唔係乜偉大理想，
反而係一個家庭討論咗好耐都未有答案嘅決定。
唔一定要自己生，我比較想係用領養嘅方式。我一直相信，親情唔係靠血緣，而係靠共同生活、
靠你日復日咁教、咁湊、咁一齊過日子。
但我太太唔係一開始就贊成。
佢猶疑咗好耐。
佢話自己唔肯定做唔做到「視如己出」，
又擔心外人點睇——
會唔會有人背後講你「唔係親生，梗係唔同」？
又或者，萬一將來發現相處唔來、出現衝突，
自己會唔會忍唔住，竟然真係想「送返去」？
（呢啲唔係假設。社工都講過，有家庭真係咁做過。）
佢話，如果真係要行呢條路，
佢唔可以抱住「試下囉」嘅心態，
因為呢條路，牽涉嘅唔係一件事，而係一個人。
「不如試下做寄養家庭先。
如果我可以做到真心咁去照顧、去對一個唔係自己生嘅小朋友好，
咁我就可以答應你，認真去考慮領養。」就係咁，我哋開始咗申請寄養家庭資格。
過程唔算簡單，要上堂、面試、評估你屋企環境，
仲有一連串既程序要過。
但一通過，第一個小朋友嚟得非常快。
係個一歲半嘅細路仔。
佢攬住我哋嗰下，我太太望住我，冇講嘢，
但我知佢內心其實好複雜。
就係咁，我哋正式開始咗成為寄養家庭嘅旅程。
每一個都唔一樣，每一個都教識我哋一啲嘢。呢個系列，我會慢慢寫落去，
想記低我哋一家人學習點樣去愛、去接受、去放手，
記低呢啲無人會幫你影低，但值得記得嘅片段。
如果有緣，你可能會一路睇住我哋嘅故事，
一路見證，點樣由一次「試下」，
慢慢變成，一種「真心對待」。
ZH_HK 
EN