travelmama

蜜蜜遊

TravelMaMa 蜜蜜遊 不嬲都打正旗號做後生仔生意，但出奇地，我地個服務竟然吸引左呢一班我地唔敢諗嘅客人。前一排腦細親自落場幫4位70歲後的花樣姐姐搞日本自由行(去到日本仲日日搵住佢地報平安)，以為係一個紀錄，點知最神奇嘅事仲有後續。

我地出現左第一位正宗九十歲後嘅老友記幫襯我地自由行去韓國，我必須講，佢係一位健步如飛嘅九十歲客人。

有時候，我地都會有老友記搵我地報郵輪，自由行真係好少見，通常講講下都係想跟番團。呢個情況好常見，就算我阿媽都係鍾意車上車落。因此，呢位客人真係好特別，佢本身係隔離睇左一大輪韓國資料，但佢話人地唔信佢要自由行，一直夾佢去跟團，於是佢行過隔離（即係我地）再問，因為我地似乎冇團呢個選擇。

呢位老友記去韓國嘅功課，真係有數十頁，個手字仲好靚，地方資料充足，仲有基本韓文發音。平時我要做內部旅行字典，以為自己好勁；但係，見到呢本真正大師級自家制旅行天書，簡直要搵個地方埋左自己。