2026 歐洲旅遊新政策：羅浮宮門票加價、羅馬許願池收費、米蘭住宿稅、荷蘭風車村入場費
去歐洲旅行，以前大家最擔心嘅可能係「治安」或者「罷工」，但踏入 2026 年，各位旅遊達人可能要面對一個新常態，「以價制量」的付費時代正式來臨。
隨著疫後報復式旅遊潮持續，歐洲各大熱門城市都面臨住極嚴重嘅「過度觀光」（Overtourism）問題。為咗保護古蹟、提升旅遊品質，以及應付龐大嘅維修開支，多個國家不約而同宣佈咗新嘅收費政策。由法國巴黎嘅羅浮宮，到意大利羅馬嘅許願池，以前覺得理所當然嘅「免費」或「平價」體驗，即將成為歷史。
Travel Mama 幫大家整理咗 2026 年歐洲旅遊嘅 4 大關鍵變動。如果你正計劃緊下年嘅歐洲之旅，記得要 Update 下你嘅預算表同攻略啦！
🇮🇹 羅馬 Rome：丟硬幣許願要買飛？特雷維噴泉實施收費
去羅馬，邊個唔想去特雷維噴泉（Trevi Fountain）背對池水丟個硬幣，祈求重返羅馬？但現實往往係：你連逼入去池邊都難，更莫講話影張靚相。為咗解決長期人患問題，羅馬市政府終於出招。
【最新政策】
- 實施日期： 預計 2026 年 2 月 1 日起
- 收費詳情： 於日間高峰時段，想進入噴泉前方「近距離區域」嘅旅客，每位需支付 €2 入場費。
- Travel Mama 分析： €2 其實唔貴，甚至可以話係「超值」。因為收費意味著有人流管制，你終於唔使同幾百人身貼身咁影相。如果你只係想遠觀，喺上方廣場同周邊公共空間睇依然係免費嘅。不過，想近距離感受《La Dolce Vita》嘅浪漫？記得預留這 €2 散銀。
🇫🇷 巴黎 Paris：羅浮宮針對「非歐盟遊客」大幅加價
作為世界四大博物館之首，羅浮宮（Musée du Louvre）一直係巴黎嘅流量擔當。不過，想要一睹《蒙娜麗莎》嘅微笑，代價將會變得更高昂，特別係對於我有哋呢啲來自亞洲嘅遊客。
【最新政策】
- 實施日期： 2026 年初起
- 收費詳情： 非歐盟（Non-EU）旅客嘅基礎入場費將調升至 €32（加幅高達 45%！）。
- 額外條款： 自 1 月 14 日起，非歐洲經濟區（EEA）旅客甚至可能面臨額外 €10 嘅附加費。
- Travel Mama 分析： 呢個加幅確實驚人，換算港幣一張飛隨時過 $300。館方解釋係為咗升級安保同翻新設施。既然錢一定要畀，建議大家一定要提前網上預約，同埋預留足夠時間（至少半日）喺館內，睇多幾件鎮館之寶先至回本！
🇳🇱 荷蘭 Netherlands：風車村告別免費時代
講起荷蘭，一定會諗起風車。桑斯安斯風車村（Zaanse Schans）一直係遊客必去嘅露天博物館，以前大家可以隨意漫步影相，感受水鄉風情，但呢種「免費午餐」即將結束。
【最新政策】
- 實施日期： 2026 年春季起
- 收費詳情： 將正式實施入場費制度（具體金額待定）。
- Travel Mama 分析： 其實風車村近年人滿為患，嚴重影響當地居民生活。收費係為咗控管人流同維護文化遺產。雖然要畀錢，但相信付費後參觀品質會提升，唔使再驚影相背景全部都係人頭。
🇮🇹 米蘭 Milan：奧運光環下的「房價稅」
米蘭將會主辦 2026 年冬季奧運會，呢個時尚之都正準備迎接全球遊客。作為代價，市政府決定調高旅遊住宿稅（City Tax）。
【最新政策】
- 實施日期： 2026 年起
- 收費詳情： 依據住宿等級（星級）上調旅遊稅，收入將用於基建同交通升級。
- Travel Mama 分析： 凡係舉辦奧運嘅城市，物價同房價上漲係必然定律。如果你唔係專程去睇奧運，建議避開賽事期間（2026 年 2 月）前往米蘭，或者要有心理準備酒店預算要預鬆啲。
💡 Travel Mama 建議：
綜合以上 4 點，我哋可以見到歐洲旅遊正走向「付費精緻化」。對於計劃 2026 年出遊嘅你，我有以下建議：
- 預算要預鬆： 唔止係機票酒店，連門票同城市稅嘅開支都要預多 10-20%。
- 行程要趁早： 收費往往伴隨著限流。羅浮宮、許願池呢啲熱點，將來可能唔係「有錢就入得」，而係要「搶預約 Slot」。
- 尋求專業協助： 政策變動頻繁，自由行容易睇漏眼。如果你想慳心機，不妨搵 Travel Mama 幫手規劃。無論係小包團定係代訂門票，我哋都會幫你及時 Update 最新資訊，避免去到門口先發現要畀錢或者入唔到嘅尷尬情況。
世界喺度變，旅遊方式都要跟住變。雖然貴咗，但只要規劃得好，歐洲依然係嗰個令人怦然心動嘅歐洲。想了解更多 2026 歐洲行程？隨時搵我哋傾下！