我想生活喺一個讚美城市

以前細個成日聽：「做得好就係應該，唔好驕傲。」

喺學校考試攞高分，老師可能只會話：「下次繼續努力。」

屋企人就更直接：「唔使開心得滯，你隔籬阿明都攞100分。」

咁樣大個，久而久之，你會發現自己學識咗一種奇怪嘅能力：欣賞留喺心，嘴巴閉緊。

明明見到身邊人做得好、表現出色，心裏面係佩服嘅，但講出嚟就變成：「嗯，好啦，咁囉。」

「你好叻」、「我欣賞你」、「你今日表現得好好」呢啲字眼，硬係講唔出。

反而外國人就唔同。我記得有次同個外國同事開完會，佢當住成team人面前話我做得「Absolutely brilliant!」然後拍吓膊頭，再加句：「We’re lucky to have you on the team.」

嗰刻我都唔知點反應，笑吓，講句「Thanks」就閃人，返到自己位仲有啲唔自然，覺得好似做錯咗乜咁。

但老實講，心裏係開心嘅。被人肯定，永遠都唔會難受。

可能我哋成個社會都係咁長大，唔讚人、怕人自滿、驕傲，結果就變成一種文化：好嘅唔講，唔好就照插。

我呢一代人，其實一直都係受上一代嘅批評之苦。

由細到大聽慣咗「你仲可以做好啲」、「你唔夠勤力」、「點解唔似人哋咁」

變咗下意識都會用這種方式對待身邊人，甚至對下一代。

有時望住自己個仔，佢明明已經做到八十分，

但我仍然第一句係：「點解嗰題你都會錯？」

講完自己都知唔啱，但條反射弧太深，唔自覺就出口。

所以我而家努力練習緊，讚賞唔係溺愛，唔係冇原則。

係一種鼓勵，一種力量，係幫對方認可自己價值，行遠啲。

我唔想再將批評文化傳落去，唔想我個仔大個之後，都係講唔出一句「你做得好」，

唔想佢係一個心入面好感激，但嘴巴永遠唔識講感謝嘅人。

所以，我希望有一日，我可以生活喺一個「讚美城市」，

唔係淨係識批評、比較、踩低人嘅地方。

一個人，每日聽一兩句欣賞說話，可能就會變得唔同。

我哋日日都用緊言語去影響人，咁點解唔用嚟讚人多啲、鼓勵多啲呢？

一句讚賞，唔會令你輸咗咩，反而會令世界好啲。

#讚一句唔會死 #香港唔應該淨係識批評 #我想生活喺一個讚美城市