OUR STORY · SINCE 2015
品牌故事
小店，有自己的節奏。
自2015年，專注小包團及私人訂製。
從一個小小的想法開始，
用旅遊連繫人與世界，也連繫喜歡旅行的你。
01
Our story began in 2015
故事由 2015 年開始
2015 年，Travel Mama 喺香港成立。
創業嗰陣，其實冇乜宏大理想，更加冇打算將旅行社做成一個甚麼大品牌。只係想試吓，能否按照自己相信嘅方式經營一盤生意，做自己認為值得做嘅旅遊產品。
旅行社呢門生意，有時幾矛盾。旅行本身充滿樂趣，但安排旅行往往由一大堆繁瑣細節組成。酒店、交通、路線、時間、供應商，每樣事情都可能影響一段旅程。
慢慢發現，我哋對呢啲細節竟然有一種近乎固執嘅興趣。
於是，Travel Mama 就咁一路做落去。
合作夥伴HIS · Miki Travel · DDMC · Tour America LLC · CityLine
02
OTA at our own pace
一間有啲佛系嘅旅行社
我哋一直都知道，市場上有好多比 Travel Mama 更大、更出名、產品更多嘅旅行社。
我哋亦冇太大興趣同人鬥，或者日日chur住客人推銷。
有人會形容呢種經營方式做「佛系」，我哋覺得都幾貼切。畢竟每個人對旅行都有唔同要求，適合我哋嘅客人自然會欣賞我哋嘅做法，其他人亦有自由選擇更適合自己嘅旅行社。
團隊唔大，能夠專心做嘅事情始終有限。與其乜都做，倒不如將時間花喺真正想做好的事情上。
至於是否每一單生意都要爭取到？
有時放手，大家反而都輕鬆。
你享受到理想嘅旅程，
我哋得到工作嘅快樂。
03
Over a decade on, still small
十多年後，仍然係一間小公司
經營一間旅行社，遠比外界想像中繁瑣。
有時一日十幾個鐘都喺度研究行程、改善網站、調整系統，又或者處理一啲客人根本唔會知道嘅問題。
有啲事情，可能做好之後都冇人特別留意。但如果做得唔好，往往就會有人發現。
講起 Work-life balance，我哋大概冇乜資格分享心得。
不過，做咗咁多年，最令我哋開心嘅，係能夠按照自己嘅想法，建立咗一間有自己性格嘅公司。
Travel Mama 未必會成為家傳戶曉嘅品牌，亦冇必要。
如果有一日，你想搵人認真幫你安排一段旅程，而剛好認同我哋嘅做事方式，歡迎你搵 Travel Mama。
緣份到，自然會見面。緣份唔到，至少你已經睇晒呢段介紹啦！
