[Foster Family Diary 3] A Cycle After Ten Years

上次講到第一位嚟到我哋屋企嘅寄養小朋友，係一個一歲半嘅男仔。

喺寄養嘅世界入面，佢算係原生家庭最幸福嗰個。因為佢媽媽只係因為突然入院需要短期轉介，佢亦係唯一一個有明確時間表可以返屋企嘅人。當時我哋以為，呢種「短期過客」嘅心理負單應該最輕。後來先知，原來之後再接嘅個案，都冇一個好似佢咁「簡單」。

接佢返嚟嗰陣，我個仔已經讀緊小六。我同太太已經十年冇湊過 BB，屋企嗰啲育嬰記憶，好似一啲被鎖喺舊電腦 Desktop 深處、已經變咗灰色嘅 Folder 咁，平時根本唔會開啟。

頭幾日，我哋完全進入咗「半新手父母」模式，成日雞手鴨腳。喺日常混亂之中，我哋先慢慢搵返嗰種久違嘅疲累同快樂。好在呢個男仔好合作：行得、走得、玩得、又食得。唯一係每晚睡前，佢好似一定要感受到嗰份安全感，要我哋輪流揞佢兩三個鐘先肯瞓。

大概一個多月之後，佢媽媽康復，可以接返佢。臨走之前，佢寫咗一張心意卡畀我太太。

做咗寄養家庭咁多年，到而家呢張卡都仲係我哋收到嘅第一張，亦係唯一一張。喺呢個大家習慣用 AI 代筆嘅年代，嗰幾行真心嘅字，比任何 Data 都更加珍貴。

預告：那位讓我們眼濕濕的「大小姐」

呢個小朋友走咗之後，過咗好短時間，第二個小朋友就嚟咗。佢亦係我哋最唔捨得嘅嗰位「大小姐」。我太太每次提起佢，都仲會眼濕濕。呢位小朋友點樣「教識」我哋去放手，又點樣喺我哋心中留低咗一格永遠無法刪除嘅視窗？

呢個故事，留返下次有機會再講。

下次見。